چاند نظر آنے سے متعلق رمضان کی پیش گوئی

رمضان 2025: سعودی عرب، خلیجی ممالک اور پاکستان میں چاند نظر آنے کی توقعات

ماہرین فلکیات کے مطابق، زیادہ تر اسلامی ممالک میں رمضان 2025 کا آغاز ہفتہ، یکم مارچ سے ہونے کا امکان ہے۔ ابوظہبی میں قائم بین الاقوامی فلکیاتی مرکز کے مطابق، اسلامی ممالک 28 فروری بروز جمعہ کو رمضان کے چاند کی رویت کے لیے کوشش کریں گے۔

مرکز کے چیئرمین، محمد عودہ، نے وضاحت کی کہ فلکیاتی حسابات کی روشنی میں رمضان کا آغاز یکم مارچ کو متوقع ہے، تاہم اس کا حتمی فیصلہ چاند نظر آنے کے بعد کیا جائے گا۔ ان کے مطابق، ہلال مغربی ایشیا، بیشتر افریقی خطے اور جنوبی یورپ میں دوربین کے ذریعے دیکھا جا سکے گا، جبکہ امریکہ کے کئی علاقوں میں اسے بغیر کسی آلات کے بھی دیکھا جا سکتا ہے۔

پاکستان میں رمضان المبارک کی رویت

پاکستان کے محکمہ موسمیات نے رمضان المبارک کے چاند کے حوالے سے پیش گوئی کی ہے کہ ملک میں پہلا روزہ اتوار، 2 مارچ کو ہوگا۔ محکمے کے ذرائع کے مطابق، 28 فروری کو چاند نظر آنے کا امکان نہیں کیونکہ اس دن چاند کی پیدائش شام 5 بج کر 45 منٹ پر ہوگی، جبکہ غروب آفتاب کے وقت چاند کی عمر محض 13 گھنٹے 12 منٹ ہوگی۔

ماہرین کے مطابق، چاند دیکھنے کے لیے اس کی عمر کم از کم 19 گھنٹے ہونی چاہیے۔ اس کے علاوہ، 29 شعبان کو ملک کے مختلف علاقوں میں مطلع صاف رہنے کے ساتھ ساتھ بعض مقامات پر بادلوں کی موجودگی کا بھی امکان ہے، جو چاند دیکھنے میں رکاوٹ بن سکتا ہے۔